Қазақстанда өңделген ауыл шаруашылығы өнімін экспорттау кезінде салықтық жеңілдіктер енгізіледі
Агроөнеркәсіптік кешенде өңдеуді дамытудың негізгі мәселесінің бірі – қазір елден белсенді түрде әкетіліп жатқан шикізаттың тапшылығы. Бұған өңделмеген өнімге жоғары экспорттық бағалар, сондай-ақ импорттаушы елдердің тарифтік реттеуі ықпал етеді. Қазақстан ішінде өңдеуді қолдау үшін үкімет бірқатар қосымша қолдау шараларын енгізеді. Бұл туралы Президент жарлығымен бекітілген 2029 жылға дейінгі ҚР дамытудың ұлттық жоспарында айтылады.
Құжатта қазіргі уақытта Қазақстандағы ұн тарту зауыттарының жүктелуі 36%, май өңдеу өндірістері – 32,4% құрайтыны атап өтіледі. Мал шаруашылығы өнімдерін өңдеуді техникалық және санитариялық регламенттерге сәйкес келетін сапалы шикізаттың – сүт пен еттің тапшылығы тежеп отыр.
Сонымен бірге экономикалық жағдай өндірушілерді ел ішінде өңдеуді арттыруға ынталандырмайды. Атап айтқанда, көрші елдердің тарифтік реттеу шаралары Қазақстаннан шикізат өнімін импорттауды ынталандыруға бағытталған және өңделген өнімді импорттауды шектейді.
«Ауыл шаруашылығы өнімін өңдеуді ынталандыру мақсатында салық саясатын жетілдіру, өңделген ауыл шаруашылығы өнімін экспорттаумен айналысатын кәсіпорындар үшін уақытша жеңілдіктерді қарастыру көзделеді. Сонымен қатар, шикізатты өңдеуді ынталандыратын тарифтен бөлек және тарифтік реттеу шаралары енгізілетін болады», – делінген құжатта.
Бұл ретте өңдеу өндірістерін салу және кеңейту жобаларын субсидиялау жалғасады. Бұл ауыл шаруашылығы шикізатын өңдейтін кәсіпорындар үшін, оның ішінде терең өңдеу өнімдерін өндіру үшін инвестициялық шығындардың бір бөлігін, айналым қаражатын толықтыруға арналған несиелер бойынша сыйақы мөлшерлемелерін және жабдықты лизингке алуды өтеу туралы сөз болып отыр.